CHELSEA WAMEMNASA BATSHUAYI

Chelsea imetangaza usajili wa mshambuliaji wa Ubelgiji Michy Batshuayi kutoka Marseille

Nyota huyo wa miaka 22 amekuwa akifukuziwa na Tottenham na Crystal Palace, amesaini mkataba wa miaka miano na Blues baada ya kurejea kutoka Euro 2016 alipokuwa akiiwakilisha nchi yake.

Inaaminika kwamba mshambuliaji huyo ameigharimu Chelsea takribani paundi milioni 33.2.
“Nafurahi kufanya mkataba na moja ya klabu kubwa katika Ulaya na ninafungua ukurasa mpya wa maisha yangu. Natumai naweza kuisaidia Chelsea kushinda mataji mengi muda wote nitakaokuwa Darajani Stamford,” aliiambia tovuti rasmi ya klabu.

“Eden Hazard na Thibaut Courtois wameniambia mambo mengi kuhusu klabu hii, na ukijumlisha na ujio wa Antonio Conte, nadhani ni wakati mwafaka kwangu kuwa mchezaji wa Chelsea. Hii ni fursa ya kipekee sana kwangu na familia yangu, nasubiri kwa hamu kucheza Ligi Kuu Uingereza msimu ujao.”
Batshuayi amefunga magoli 17 katika kampeni za Ligue 1 msimu wa 2015-16.